KINABUHI

Sa daeayun nga pagpainu-ino ro daea-ura nga nagtakop sa pagpanumdum nahuyop it hangin. Nadaea sa kung siin pwede maw maghigop pa it mga kaibahan ag magbusdak it uean. Sa akon nga ginatindugan, mayad eon ru inadlaw ag uwa eon ako it mabahoe nga dueom nga nag-eandung kakon it mabuhay.

Ro kabuhi it tawo mahimutang mo nga matsa hampangan eang. Uwa ka kasayud kung asta san-o o kung basi pag-eubog it adlaw masamad eon ag ihaboy eon lang.

Namasyar ako sa daeanun nga kung siin may mga nagabaeabag nga mga higku ag mga gakueapot nga eapuk. May una pa nga kumunoy nga nagbira kakon paidaeum. Kabuhay ra akon nga pagpamuyot sa mga pwede ko kapyutan. Ra akon nga painu-ino nadueman ag nagpasugot ako nga huypon eang it hangin hasta makaeab-ut ako sa maea nga eugta ag igtu ako kaginhawa it madaeum.

Sa kaabu-abu nga akon nga gina-agyan. Kaeab-ut man it pueo nga dag-on bago ako kabugtaw sa madaeum ko nga pagtueog sa eugban sa punta gid it kumunoy. Abi ko, ratu eon ru akon nga kabuhi nga daehun hasta ako magkauban ag pagtae-tae it akon nga ngipon sa ang ngislo. Ru puno nagbunga eon ag napuslan nga katu isaea pa eang ka busoe nga kalbo. Ginhaboy eang sa tubi ag nagtubo nga makarun inugpukan eon lang.

Bukon it madali paghingabot makabuyot sa higot para makasaka eang paibabaw. Kabulig ru hangin nakaeab-ut gid ako sa daeanun kung siin maea ag may mga hilamunon ag amorseko.

Kung ako nagtuman eang sa ginsugo it mga magueang, uwa ta ako nagtaeang it akon nga daean. Abi ko katu hay tungod mabahoe eon ako makatindog eon ako ag tama eon ang utok. Pero saea gali. Sa tanan nga ginahambae it mga may uban, puro ngislo ag buktot, may kamatuuran.

Ru kabuhi, uwa gatapos nga pirde ka. Ro kabuhi gahambae kimo, musyon ay may hin-aga!